A New BaBy Girl

مساء الخير

بعد طوول انتظار ومعاناة 9 اشهر

الله رزق اختي هلا ورزقنا معاها ببنوته حلوة الي يضايق بالموضوع اني ما شفتها وما كنت موجوده بهالحدث

وبسبب تلفوني الخربان وسفر اختي غلا محد طرشلي الصوره وقاعده على رحمة الله من يتراف بحالي ويرسل

يعني بالله غلا وقتها تسافر هالحزة وهلا الله يهداها ما صدقت ان غلا سافرت عشان تولد اييه نطري شوي ليش استعيلتي

بس ما قول الا الحمدالله على سلامة اختي والله يخليلها الكتكوته الصغيرة ان شاءالله

حلا شربت

تلفوني

السلام عليكم
شلونكم شخباركم
طبعا انا اغط وارد وهذي حالتي بس المهم اني ارد :p

هالمره الي ردني ان ما بقالي وسيله للتواصل الا هالبلوق بعد ما اخترب تلفوني احس اني ضايعه من غيره طول اليوم هدوووء واحس اني منقطعه اني مو بهالدنيا والمشكله ان خلاص مافيه فايده منه اخترب مره وحده فشسوي يا اني اشتري واحد نفسه الا وهو بلاك بيري ثاني او بما ان الكل استغنى عنه وهابين بالاي فون وهذا معناته اني لازم انطر 3 اسابيع على ما اطلبه ويوصلي بس شلون انا يومين وما ادري شسوي هالمره 3 اسابيع وايد ياربي

فاريد حلا سريعا ولي يعافيكم
ولحد يقولي متوفر بالديره لاني مو بالديرة :(
ترى حالتي كسيفه


حلا شربت

عيد أضحى سعيد

عـــيـــــدكــــــــم مـــبــــاركـــ

كـــل عــــام وأنــــتـــــوا بــــخـــيــــر

أنا هنا

كح كح
اوله شالغبره الي طلعت من البلوق



شوي بس خل انظف شوي

ايييه الحين احسن



شلونكم شخباركم

من زمان ما ادري عنكم قطيت شوي لظروف خارجه عن ارادتي :)



وخواتي الحلوين بعد الظاهر لاهين



بما اني فضيت اليوم قلت خل اطل عليكم واشوف شخباركم وشلون

H1N1 معاكم ؟

في احد تطعم ولا خايفين من التطعيم

ادري اني قديمه بس شسوي مو لاني توني متطعمه ومطعمه عيالي فحبيت اشووف في احد تطعم

لان خواتي مو مقتنعين بالتطعيم

وانا ما اقولكم مقتنعه بس الصراحه خفت خصوصا ان المرض راح يزيد بالشتا وخفت احد من عيالي يصير فيه شي وعقبها اتحسف

فعشان جذييه تشجعت وتطعمنا



فانتوا اسويتوا ؟؟



الله يحفظكم ويحفظ جميع امة محمد

حلا شربت

مشروع ما بعد التخرج

مساء الخير . بعد طول غياب يايتكم ومعاي موضوع ابي اخذ رايكم فيه طبعا بعد تخرجي صار مخي فاضي و لان مخي مافيه معادلات وارقام ما استحمل فحب يسويلي مفاجأة فقالي يا هلا شرايج تسوين بزنس .قتله بزنس!!!! قالي ايي بزنس .... منو فيكم ما عنده بدل سهرة مو عارف شسوي فيهم كل وحدة منا على الاقل تمر عليها حفلتين في السنة ومن نسمع باسم حفلة يضيق خلقنا . لان لازم انروح السوق وندور ملابس . والسوق وما ادراك ما السوق ؟؟ المهم الوحدة فينا تدفع ذاك المبلغ ويا عالم تلبسة مرة ثانية ولا لأ وعقبها تظل البدلة بالكبت ماخذه مكان . فأنا ابي اساعدكم واخذ ملابسكم واعرضها عندي للايجار و بجذيه فضيت لكم الكبت و ساعدتكم على انكم اتحصلون مبلغ بدال ما تنركن بالكبت وما راح تنلبس وتتحسفين تتبرعين فيها بعد . و نفس الشي حق بدل العرايس هي لبسة وحدة وبعدين ؟؟؟ فشرايكم بفكرتي انا بفتح محل و بحط موظفين بس عشان اخدمكم وتكونون مرتاحين فما عليكم الا تيوبون لي بدلكم وانا اعرضهم و بالاخير يوصلكم مبلغ من التأجير ....... شرايكم ابي تفاعلكم معاي . شلون الفكرة واذا سويتها عندكم استعداد تأجرون بدلكم عندي ؟؟؟؟

هلا شربت

نجحنا والله وفقنا

17 يونيو 2009

هاليوم يعتبر يوم تاريخي عندي

كان هاليوم هو يوم ميلاد بنتي

بس اليوم نضاف اليه حدث كبير ماراح ننساه

اليوم هذا اقدر اني اقول ان ريلي دكتور جراح

باليوم هذا المسمى هذا افتخر فيه

لان مو بس ريلي صنع هاللقب انا كنت من العوامل الي وصلته له

ما تصدقون شنو فرحتي في ريلي واهو يبشرني بنجاحه

بوصوله لهالمركز الي كان ناطرة من فترة

اليوم حصدنا ما زرعنا

اليوم حققنا الهدف الي بسبته تغربنا

يعني غربتي ماراحت بلاش

غربتي صنعت ريلي من دكتور بسيط الى دكتور جراح

دايما افتخر اني مرت فلان

واليوم زاد فخري فيك يا ريلي الحبيب

فالف مبروك نجاحك وان شاءالله منها لاعلى ان شاءالله

وان شاءالله دايما اشوفك بهالمراكز وهالتالق



حلا شربت

Presentations

منو فيكم ما يرتبك أو يتوتر لما يكون عنده برزنتيشن؟؟

الاسبوعين الي طافوا كان عندي برزنتيشنين وطبعا حالات الاستنفار الي تصير فيني حزتها عجيبة
أول برزنتيشن كان لازم نبتكر ونبدع فيه يعني الدكتور يبي شي مو طبيعي واهوا مو كل شي يعجبه فبدت حالات الاستنفار شنو لازم نسوي شنو الفكرة وشنو وشنو وشنو كان الجروب يتكون من 5 بنات وكل وحدة فينا ساهمت بفكرة الى ان توصلنا الى الفكرة النهائية موضوع البرزنتيشن كان عن طابعة تطلع اشكال ثلاثية الابعاد عاد احنا قلبنا الكلاس معرض وكنا على اتم استعداد بس يوم يينا بنجرب اللاب توب عشان نعرض البور بوينت ولا تقع الكارثة اللاب توب مو راضي يشتغل حولنا على لاب توب ثاني جان تصير في مشكلة ثانية الا وهي ان الفيديو مو راضي يشتغل حاولنا يمين يسار راكضنا بالجامعة طرينا لاب توبات من بنات ما نعرفهم ماكو فايدة بس الحمدلله قبل نص ساعة من وقت البرزنتيشن نزلت بنا الرحمة الالهية واشتغل كل شي وليما صار وقت المحاضرة دشوا البنات ووصل الدكتور ومن كثر ما كنا امبدعين بالديكور دكاترة ثانيين طلبوا يحضرون البرزنتيشن مالنا ماشالله علينا مو هينين وقدمنا البزنتيشن وعدا على خير وبانتظار النتيجة الاسبوع الياي انشالله

واليوم كان موعد برزنتيشني الثاني بس عاد كان فريد من نوعه مو علشان سويت زين (سويت زين طل ) بس علشان كنت لازم البس بدلة واصير دليقيه على قولت حلا واروح السوق وافتر علشان ادور بدلة

ولقينا البدلة بس شيوديني فيها الجامعة؟؟ المهم صار الصبح تزقرت ولبست البدلة وصرت مضيفة طيران بس ناقصني السكارف الي عالرقبة

ووصلت الجامعة ودشيت الكلاس ولا بس وحدة لابسه بدلة مثلي هذا الي كنت خايفة منه وطول ما انا انطر دورنا كنت ارجف لاشعوري ولا ارادي ما سوت علي والله وصار دورنا وعلى حظنا بعد اللاب توب ماكان راضي يشتغل والرحمة الالهيه نزلت فينا مرة ثانية وخذينا لاب توب ثاني واشتغل خلصنا البرزنتيشن وكان الوضع متكهرب بن أعضاء الجروب للأسف وانتهى الكورس (اخر يوم دوام) على خير وبانتظار امتحانات الفاينل بالتوفيق لكل الطلبة وبالتوفيق لي انا بعد

وسلامتكم

غلا شربت