Wednesday, November 25, 2009
Monday, November 16, 2009
أنا هنا
كح كح
اوله شالغبره الي طلعت من البلوق
شوي بس خل انظف شوي
اوله شالغبره الي طلعت من البلوق
شوي بس خل انظف شوي
ايييه الحين احسن
شلونكم شخباركم
من زمان ما ادري عنكم قطيت شوي لظروف خارجه عن ارادتي :)
وخواتي الحلوين بعد الظاهر لاهين
بما اني فضيت اليوم قلت خل اطل عليكم واشوف شخباركم وشلون
H1N1 معاكم ؟
في احد تطعم ولا خايفين من التطعيم
ادري اني قديمه بس شسوي مو لاني توني متطعمه ومطعمه عيالي فحبيت اشووف في احد تطعم
لان خواتي مو مقتنعين بالتطعيم
وانا ما اقولكم مقتنعه بس الصراحه خفت خصوصا ان المرض راح يزيد بالشتا وخفت احد من عيالي يصير فيه شي وعقبها اتحسف
فعشان جذييه تشجعت وتطعمنا
فانتوا اسويتوا ؟؟
الله يحفظكم ويحفظ جميع امة محمد
حلا شربت
Sunday, August 9, 2009
مشروع ما بعد التخرج
مساء الخير . بعد طول غياب يايتكم ومعاي موضوع ابي اخذ رايكم فيه طبعا بعد تخرجي صار مخي فاضي و لان مخي مافيه معادلات وارقام ما استحمل فحب يسويلي مفاجأة فقالي يا هلا شرايج تسوين بزنس .قتله بزنس!!!! قالي ايي بزنس .... منو فيكم ما عنده بدل سهرة مو عارف شسوي فيهم كل وحدة منا على الاقل تمر عليها حفلتين في السنة ومن نسمع باسم حفلة يضيق خلقنا . لان لازم انروح السوق وندور ملابس . والسوق وما ادراك ما السوق ؟؟ المهم الوحدة فينا تدفع ذاك المبلغ ويا عالم تلبسة مرة ثانية ولا لأ وعقبها تظل البدلة بالكبت ماخذه مكان . فأنا ابي اساعدكم واخذ ملابسكم واعرضها عندي للايجار و بجذيه فضيت لكم الكبت و ساعدتكم على انكم اتحصلون مبلغ بدال ما تنركن بالكبت وما راح تنلبس وتتحسفين تتبرعين فيها بعد . و نفس الشي حق بدل العرايس هي لبسة وحدة وبعدين ؟؟؟ فشرايكم بفكرتي انا بفتح محل و بحط موظفين بس عشان اخدمكم وتكونون مرتاحين فما عليكم الا تيوبون لي بدلكم وانا اعرضهم و بالاخير يوصلكم مبلغ من التأجير ....... شرايكم ابي تفاعلكم معاي . شلون الفكرة واذا سويتها عندكم استعداد تأجرون بدلكم عندي ؟؟؟؟
هلا شربت
Wednesday, June 17, 2009
نجحنا والله وفقنا
17 يونيو 2009
هاليوم يعتبر يوم تاريخي عندي
كان هاليوم هو يوم ميلاد بنتي
بس اليوم نضاف اليه حدث كبير ماراح ننساه
اليوم هذا اقدر اني اقول ان ريلي دكتور جراح
باليوم هذا المسمى هذا افتخر فيه
لان مو بس ريلي صنع هاللقب انا كنت من العوامل الي وصلته له
ما تصدقون شنو فرحتي في ريلي واهو يبشرني بنجاحه
بوصوله لهالمركز الي كان ناطرة من فترة
اليوم حصدنا ما زرعنا
اليوم حققنا الهدف الي بسبته تغربنا
يعني غربتي ماراحت بلاش
غربتي صنعت ريلي من دكتور بسيط الى دكتور جراح
دايما افتخر اني مرت فلان
واليوم زاد فخري فيك يا ريلي الحبيب
فالف مبروك نجاحك وان شاءالله منها لاعلى ان شاءالله
وان شاءالله دايما اشوفك بهالمراكز وهالتالق
حلا شربت
Thursday, June 11, 2009
Presentations
منو فيكم ما يرتبك أو يتوتر لما يكون عنده برزنتيشن؟؟
الاسبوعين الي طافوا كان عندي برزنتيشنين وطبعا حالات الاستنفار الي تصير فيني حزتها عجيبة
أول برزنتيشن كان لازم نبتكر ونبدع فيه يعني الدكتور يبي شي مو طبيعي واهوا مو كل شي يعجبه فبدت حالات الاستنفار شنو لازم نسوي شنو الفكرة وشنو وشنو وشنو كان الجروب يتكون من 5 بنات وكل وحدة فينا ساهمت بفكرة الى ان توصلنا الى الفكرة النهائية موضوع البرزنتيشن كان عن طابعة تطلع اشكال ثلاثية الابعاد عاد احنا قلبنا الكلاس معرض وكنا على اتم استعداد بس يوم يينا بنجرب اللاب توب عشان نعرض البور بوينت ولا تقع الكارثة اللاب توب مو راضي يشتغل حولنا على لاب توب ثاني جان تصير في مشكلة ثانية الا وهي ان الفيديو مو راضي يشتغل حاولنا يمين يسار راكضنا بالجامعة طرينا لاب توبات من بنات ما نعرفهم ماكو فايدة بس الحمدلله قبل نص ساعة من وقت البرزنتيشن نزلت بنا الرحمة الالهية واشتغل كل شي وليما صار وقت المحاضرة دشوا البنات ووصل الدكتور ومن كثر ما كنا امبدعين بالديكور دكاترة ثانيين طلبوا يحضرون البرزنتيشن مالنا ماشالله علينا مو هينين وقدمنا البزنتيشن وعدا على خير وبانتظار النتيجة الاسبوع الياي انشالله
أول برزنتيشن كان لازم نبتكر ونبدع فيه يعني الدكتور يبي شي مو طبيعي واهوا مو كل شي يعجبه فبدت حالات الاستنفار شنو لازم نسوي شنو الفكرة وشنو وشنو وشنو كان الجروب يتكون من 5 بنات وكل وحدة فينا ساهمت بفكرة الى ان توصلنا الى الفكرة النهائية موضوع البرزنتيشن كان عن طابعة تطلع اشكال ثلاثية الابعاد عاد احنا قلبنا الكلاس معرض وكنا على اتم استعداد بس يوم يينا بنجرب اللاب توب عشان نعرض البور بوينت ولا تقع الكارثة اللاب توب مو راضي يشتغل حولنا على لاب توب ثاني جان تصير في مشكلة ثانية الا وهي ان الفيديو مو راضي يشتغل حاولنا يمين يسار راكضنا بالجامعة طرينا لاب توبات من بنات ما نعرفهم ماكو فايدة بس الحمدلله قبل نص ساعة من وقت البرزنتيشن نزلت بنا الرحمة الالهية واشتغل كل شي وليما صار وقت المحاضرة دشوا البنات ووصل الدكتور ومن كثر ما كنا امبدعين بالديكور دكاترة ثانيين طلبوا يحضرون البرزنتيشن مالنا ماشالله علينا مو هينين وقدمنا البزنتيشن وعدا على خير وبانتظار النتيجة الاسبوع الياي انشالله
واليوم كان موعد برزنتيشني الثاني بس عاد كان فريد من نوعه مو علشان سويت زين (سويت زين طل ) بس علشان كنت لازم البس بدلة واصير دليقيه على قولت حلا واروح السوق وافتر علشان ادور بدلة
ولقينا البدلة بس شيوديني فيها الجامعة؟؟ المهم صار الصبح تزقرت ولبست البدلة وصرت مضيفة طيران بس ناقصني السكارف الي عالرقبة
ووصلت الجامعة ودشيت الكلاس ولا بس وحدة لابسه بدلة مثلي هذا الي كنت خايفة منه وطول ما انا انطر دورنا كنت ارجف لاشعوري ولا ارادي ما سوت علي والله وصار دورنا وعلى حظنا بعد اللاب توب ماكان راضي يشتغل والرحمة الالهيه نزلت فينا مرة ثانية وخذينا لاب توب ثاني واشتغل خلصنا البرزنتيشن وكان الوضع متكهرب بن أعضاء الجروب للأسف وانتهى الكورس (اخر يوم دوام) على خير وبانتظار امتحانات الفاينل بالتوفيق لكل الطلبة وبالتوفيق لي انا بعد
وسلامتكم
غلا شربت
Thursday, May 14, 2009
summer vacation
شلونكم شخباركم
طبعا الحمدالله ريلي الاسبوع الي طاف قدم امتحانه الاول وعلى حسب كلامه ان قدم زين
وبس ناطرين الامتحان الثاني على شهر يونيو ان شاءالله ونخلص على خير
وانا حاليا قاعد اشيل قشي شوي شوي يعني على مزاجي متى ماصار لي مزاج اشيل شوي لاني ان شاءالله راح انتقل لمنطقه ثانية عن قريب ان شاءالله والله يسهل
بس اكيد ما راح اقدر اروح
لاني قبست عليهم اليوم الي اصريت فيه عالمكسيك وحنيت وخلاص كنه قاعدين نشوف المنتجعات الي فيه صار عندهم هالمرض يعني ما اعتفسوا الا يوم قررت اني اروح هناك
حدي قبسه :)
فقعدت افكر بمكان ثاني ما لقيت لان حتى امريكا الحين الواحد بعد يخاف يروح
ولا جاان غيرت اتجاهي لهواي لان هذي ثاني مكان بودي اروحله
فكرنا بالكروز بعد
وخاصتا ديزني كروز بس لما شفت رحلاتهم كلها نفس الاماكن الي انا رايحتلها العام بس الاختلاف عدد الايام
فما ادري عيالي حابين دزني كروز لانهم العام حدهم هيصوا بس انا ابي اروح مكان يديد
فشكلي بالنهايه راح اقعد بمنطقتي وما كو سفر
انتوا شمقررين
وين بتقضون الصيف ؟؟
حلا شربت
Wednesday, April 29, 2009
حصاد الغربه
خمس سنين مرت واحنا بالغربه بعيدين عن الاهل والاحباب
تحملنا فيها الكثير وصبرنا وااايد
والحين وصلت اللحظه الحاسمه
اللحظه الي يكرم المرء او يهان
الاسبوع الياي اسبوع صعب علينا
راح نحصد سنين غربتنا في امتحان يحدد مصير ريلي
وايد خايفه من الامتحان ومستانسة بنفس الوقت
خايفه ان ما يقدم عدل وما يعدي وحزتها مشكله ما ادري اشلون راح اواجهها
ومستانسه ان خلاااص بخلص ونرتاح شوي يعني صح بعد باقيلنا جم سنه بعد بس على الاقل نكمل هالغربه براحه وما يكون ورانا هم الامتحان وتكون شهادته عنده ما نحاتي شي
بس على ما ياخ> هالشهاده الا روحنا طالعه وخالصه
لان ماراح نعرف النتيجه الا على شهر يونيو يعني ناكل بنفسنه ليمن يخلص
الله يعدي هالفترة على خير
ووفق الكل والجميع
حلا شربت
Monday, March 30, 2009
طموحكم
شنو تحبون تصيرون ليه كبرتوا ؟
هالسؤال اتوقع الاغلبيه اهلهم سألوهم اياه
واكثركم يمكن اختار دكتور او مهندس او شرطي كأن مافي مهن غيرهم
لما كنت صغيره ما ا>كر اني اخترت اي من هالمهن
ما ادري ما كان عندي الظاهر طموح اي الظاهر الا صج
ما ادري ليش ؟ هل انا مو طبيعيه
يعني هلا وغلا كان طموحهم انهم يصيرون دكاترة
انا ما عندي هالشي
يعني كنت ماشيه عالبركه
يمكن لاني ما كنت احب الدراسه لاني من بد خواتي ما احب الدراسه
بس ترى مو معناته اني فاشله لا والله كان مستواي متوسط مو ممتاز مثلهم
فانتوا هل اخترتوا هالاختيارات الرئيسيه
ولا عريتوا شوي عنها ؟؟
ولا في احد مثل حالتي ؟ياريت القى عشان احس اني طبيعيه :))
وهل حققتوا الي تبونه ؟
حلا شربت
Saturday, March 21, 2009
Happy Mother's Day
Happy Mother's Day" means more Than have a happy day.Within those words lie lots of things We never get to say.
It means I love you first of all,Then thanks for all you do.It means you mean a lot to me,And that I honor you.
But most of all, I guess it means That I am thinking o f Your happiness on this, your day,With pleasure and with love.
It means I love you first of all,Then thanks for all you do.It means you mean a lot to me,And that I honor you.
But most of all, I guess it means That I am thinking o f Your happiness on this, your day,With pleasure and with love.
عيد الأم عيد أغلى انسانة بالوجود
بهالمناسبة حبيت أعايد على كل ام بالعالم واقولها كل عام وانتي بخيربما فيهم خواتي وحبيت أعايد على أمي بالأخص وأقولها الله لا يحرمنا منج يالغالية والدنيا بدونج ما تسوى شي ولو عطيتج كنوز الدنيا كلها ما توفيج حقج وأدعي ربي انه يطولنا بعمرج يا نبع الحنان وعسى الله
يخليلكم أمهاتكم وما يحرمكم منهم يارب
غلا شربت
Tuesday, March 17, 2009
Break Topics
هالكورس ماخذه مادة عند دكتور تركي والله لا يقول الواحد ياخذ عنده مرة ثانية بس شنسوي هذا الموجود وهالدكتور من كثر ما محاضرته غثيثة بين الشرح يعني بنص الوقت يقول صار وقت البريك منو عنده موضوع وطبعا هالموضوع يكون خارج المنهج عشان يلطف الجو فأول موضوع كان عن شلون نتصرف بالمواقف الصعبة والمرة الثانية سألنا عندكم موضوع تحبون تناقشونه فقالتله وحدة التدخين جان يتبوسم ويقول انا مادري ليش شايفين التدخين مشكلة في شغلات ثانية تضر أكثر بالصحة مثل السكر والسمنة وقال انا ما ادخن ولا اقولكم دخنوا واذا الواحد دخن 10 سيجارات باليوم عادي ماراح يموت ( اي نعم ماراح يموت بنفس الحزة ب بعد جم سنة بدقه الأمراض وبياكلها) وقال ان البيبسي مضر أكثر من التدخين يعني بط راسنا واهو يحاول يقنع فينا واذا أحد أفحمه بشي يطنش فيه ويكمل نظريته العجيبة انا معاه ان فيه أشياء ثانية تضر بالصحة بس مو معناته انه التدخين زين وما يضر وايد ويالنا الكلاس الي عقب وقال ادري اني ما اقنعت أحد فيكم بس تخيلو انكم قاعدين تشوفون تلفزيون وكان فيه بعوضة عضت الفيل ومات انتو راح تحقدون على هالبعوضة المسكينة بس انتو ما تدرون ان قبل لا يصير هالشي كان في ثعبان عض الفيل قبل البعوضه واهوا الي تسبب ابموته يالله لف راسي بهالمثال يعني ببين لنا ان لازم نشوف المشكلة الاكبر بعدين الأصغر فالأصغر ويالنا يوم وقال انه في ناس تقدر تاكل قلاصات وحديد وهالسوالف ويوم قالنا ان المفروض نجاوب على كل سؤال بنعم وصدمني بشغلة الا وهي ان محد راح القمر!! عاد صج هالحجي اهوا قالنا جم شي اقنعني بس ليلحين أحس ماني قادرة اقتنع 100% فاذا فيكم احد عنده دليل على هالشي بليز يقولي وانتظروا سوالف الحجي مهمت الجديدة انشالله بالاسابيع اليايه
غلا شربت
Thursday, March 12, 2009
عطلة الربيع
باقي يوم وتبدي عندنا عطلة الربيع
اسبوعين راحه حلوين
صج اني محتاره بهالاسبوعين وين اطلع اليهال بس هم احسن من دوام المدارس
حاليا مقررين نوديهم نياجرا فولز يومين يغيرون جو
بس غير هاليومين وين اوديهم ما ادري
خصوصا اني راح اطلع انا وياهم بروحي يعني بدون ريلي
فاي مكان اوديهم اهمه يلعبون وانا اقعد بروحي فامل
ومساكين ما يمديهم يلعبون الا قتلهم يلا خلاص خل نرد
*
وان شاءالله بعد الجو يتعدل لان صج صج ملييييت من البرد والثلج ابي شمس ابي حر اشتقت حق الحر
تعبنا من الملابس الثقيله
ولهنا عالصيف
*
حلا شربت
Sunday, March 8, 2009
الله لا يحرمني منكم
حبيبتي ونور عيني حلا انا ما استاهل الكلام الي كتبتيه عني اخاف الي يقراه يصدقه وبعدين لاتنسين ان انا ما اصير انا الا لان انتي اختي لو مو انتي جان ما تعلمت اني احب ولو مو انتي جان ما تعلمت الحنان انا بدونج ما اسوى شي يا اغلا واعز اخت الله عطاني احلا هدية وهي انتي ترى على فكرة الكلام الي كتبتيه عني ضربيه في اثنين يكون حلا وما انسى غلا ثالثتنا الي قاعدة في قلبي والي ما تسمع الكلام كل ما اقولها كبرت على الهدية واني ما ابي منها شي مصرة تييب الهدية ما تدري انها ثاني احلا هدية الله يعطيني ياها
اما الاغنية ذكرتي بأيام الشباب ومعلومة ترى بجيت لما قلت بس لاني تذكرت الايام الي كنا فيها مع بعض
وما اقول ان الله لا يحرمني من نور عيني
هلا شربت
Saturday, March 7, 2009
HaPpY BiRtHdAy HALA
اختي الغاليه
8 مارس
بهالمناسبة السعيده
احب اقولج كل عام وانتي بالف خير
وعقبال ال 100 سنه ان شاءالله
وعسى الله يخليج لنا ولا يحرمنا منج
لانج فعلا ونعم الاخت
اخت كل وحده تتمنى يكون عندها اخت مثلج
دايما تكونين معانا بكل الاوقات
اي وقت نحتاج لشي نلاقيج انتي اول وحده
دايما تعطين وما تنطرين مقابل
دايما تضحين عشانه
ففي يوم ميلادج اقولج مشكورة على كل الي قدمتيه لنا
واقولج انج ما قصرتي معانا باي شي
فعسى الله يطولنا بعمرج ويخليج لنا يارب
:**
شرايج بهالاغنية ؟ شذكرج فيه ؟
حلا شربت
بهالمناسبة السعيده
احب اقولج كل عام وانتي بالف خير
وعقبال ال 100 سنه ان شاءالله
وعسى الله يخليج لنا ولا يحرمنا منج
لانج فعلا ونعم الاخت
اخت كل وحده تتمنى يكون عندها اخت مثلج
دايما تكونين معانا بكل الاوقات
اي وقت نحتاج لشي نلاقيج انتي اول وحده
دايما تعطين وما تنطرين مقابل
دايما تضحين عشانه
ففي يوم ميلادج اقولج مشكورة على كل الي قدمتيه لنا
واقولج انج ما قصرتي معانا باي شي
فعسى الله يطولنا بعمرج ويخليج لنا يارب
:**
شرايج بهالاغنية ؟ شذكرج فيه ؟
حلا شربت
Tuesday, March 3, 2009
وحشتوني
اللقاء حلو بس الفراق صعب
مر شهر من احلى ما يكون مع اهلي استانسنا مع بعض ملو علينا البيت
سوولي حركه
اول اسبوعين من وصولهم كان من احسن ما يكون بس اخر اسبوعين ما صدقنا متى خلصوا والاهم انهم اخلصو على خير
تدرون ليش كرهنا اخر اسبوعين من فبراير
مثل ما قريتوا في البوست الي طاف عن موجه المرض الي يتنا وطاح واحد ورى الثاني
بس المسكينه اختى ما ترقعت
من شي ليه شي وظلت اسبوعين واحنا نراكض لها من صيدليه ليه الثانيه
والحمدالله خلص هالشهر على خير
وردوا الديرة سالمين
شهر كان حلو بكل ما فيه
اهم شي اني شفت اهلي وغيرنا جو معاهم
بس لابد من هالشهر ان يخلص وتوصل اللحظه الي اكرها اهي الفراق
عقب ما البيت كان مليان وفيه حركه صار صخه وهدوء
اول يومين كانوا صعبين
بس شوي شوي قدرت اتعدى هالمرحله
وان شاءالله التقي معاهم في نهايه السنه
وحشتوني
حلا شربت
Tuesday, February 17, 2009
sick
واي الجو صاير متقلب الواحد ما يدري شنو يلبس
مره حر ومره برد ومره ثلج وووو
كلش ما احب هالفترة
العاده هالتقلب يبدي على شهر ابريل بس هالسنه بادي حيل مبجر
وهالتقلب يبدي معاه الامراض
ولدي مسكين من الخميس واهو طايح انفلونزا
صخونه وكحه وبلاعيم
الحين الحمدالله صار احسن بس الكحه مو راضيه تهده
وخلص من الانفلونزا وعاده غلا اختي
ومن امس واهي طايحه بالفراش مالها خلق شي
وبنتي بعد الحين بادية تسخن
والله يستر من عليه الدور عقب
*
حلا شربت
Saturday, February 14, 2009
Thursday, February 12, 2009
مقالب
أكيد صادفتكم مقالب بحياتكم بعضها كنتو انتو الضحية وبعضها كا غيركم فانا اليوم حابه أقولكم سالفه صارت معاي لما رحت دبي أزور صديقة عزيزة علي وايد تعرفت عليها قبل 3 سنين في بوسطن طبعا بما اني انا بديرتها فما كانت ترضى ادفع شي كل مارحنا مكان نسوي لوية على هالموضوع وكله اهيه الكسبانة تخيلو تقول حق الي بياخذ الحساب ان اليوم عيد ميلادي عشان ما تخليني أدفع ومرة انا دفعت جان تنادي الريال وتقوله انته عربي وتعرف ان اذا احد زارك لازم ما تخليه يدفع فردلي الفلوس لانه عيب اهي تدفع والاهبل ما صدق وردلي الفلوس وانا اقوله ما يصير تقص عليك ويقولي لا والنبي ما يصحش نزين انت شكو المهم انا طفرت عاد من هالسالفة وتفشلت صراحه ماصارت كله اهيه الي تدفع فمرة كنا قاعدين بمطعم جان اقوم واخذ جنطتها واحطها يمي بحيث ماتقدر تاخذها بس انا الغبية نسيت اشيل جنطتي فلما يابلنا الجرسون الحساب انا خذيته واهيه يايه بتاخذ جنطتها ولا ما تلاقيها جان اضحك (يعني صايدة الحركة) جان تاخذ جنطتي (الخطة ما كملت كنت لازم احسبها عدل بس للأسف راحت علي) فصار عند كل وحدة فينا جنطة الثانية ومحد راضي يدفع عاد اهيه قاعدة تقرالي ورقه التقييم الي عطونه اياها وانا قاعدة اشوف الصور الي صورناها بالكاميرا وقاعدين نضيع الوقت وكل وحدة تقول حق الثانية عطيني جنطتي بس وين عمك اصمخ وفجأه يتني فكرة جان اقعد اضحك بصوت عالي جني هبله ومرة وحده قمت وخذيت جنطتها وقلت لها في امان الله انا ماشيه ونزلت تحت ولو شفتو علامات الصدمه الي على ويها المهم انا هديتها وغشيت من الضحك والناس تقول شفيها هذي عسى ما شر ورحت السيارة وبطلتها لان عندي جنطتها وفيها المفتاح ونطرتها ليما يت واهية يايه مفورة (بركان هائج) وانا ماني قادرة امسك روحي وقعدت ترمسني بالاماراتي شالمناجر ومادري شنو عاد انا اقولها الترجمة بليز (أحر ما عندها أبرد ما عندي) وظلت 10 دقايق معصبة وترمس وانا اضحك ليما طخت وهدت ولكن ماكو فايدة ردتلي اياها اليوم الثاني بس شرايكم بالحركة الي سويتها حلوة مو؟؟
غلا شربت
Tuesday, February 10, 2009
مساء الخير
باركولي اطلعت نتايج المواد والحمدلله المادة الي خايفة منها خذيت فيها- ب بس قاعدة اشاور عقلي اني اروح اكلم الدكتور يمكن يغيرها . اقترحت هذا الاقتراح على زوجي بس قالي ان احط عقلي براسي وما اكون دبور زن على خراب عشة يعني المقصد اني ارضى بالدرجة احسن من ان الدكتور يحطني براسة.
ولكن عندي مادة من غبائي لا عفوا من امانتي الزايدة انا الي يبته حق نفسي لان مادتي هذا هي اساسا تهيئ الواحد ان يكون جريئ ويوقف على المسرح ويتكلم عن موضوع بدون نوت وكوني انا استحي اطلع على المسرح جدام الحشد وامسك مكرفون ( اخاف احد يعجب بصوتي ) طلعت ( هو انا أقدر اقول لأ) وبعدها طلبت الدكتورة ان نعطي حق نفسنا الدرجة وانا عطيت حق نفسي- أ وهذا بالفعل الي عطتني ياه . بشنو تشيرون علي اساحل اي دكتور!!!
هلا شربت
Tuesday, February 3, 2009
عند الامتحان يكرم المرء او يهان
اليوم اول يوم اجازة لي بعد امتحانات الفاينل الي ما بقت اتخلص يقولون ختامها مسك بس انا شكلها ختامها مسك بس مال بو امية فلس؟ !
قولوا لي ليش ؟..(.اشدعوة ولا احد يسألني ويقولي ليش؟) اوكي ليش؟ المعادلة سهلة الامتحان كان 25 سؤال اختياري وانا مشيرة 26 الي قهرني ان اول 15 سؤال كانوا الاجوبة كلها صح بس لما وصلت الحلوة ( الي اهيا انا) عند السؤال 15 مخي ما قام يقلب الصفحة لا مو بس جذي علق واطريت اسويله فورمات وعليكم الحساب حذف كل الفايلات وما خلالي الا اسمي وعنواني( الصراحة يعطي العافية على الاقل اقدر ارجع البيت مو يقولون خرجت ولم تعد!!) الخلاصة ان لما وصلت البيت قلت مالج الا حل واحد يا هلا والي هو اني اطرش ايميل حق الدكتور واساحلة ومن مجمل الكلام الي كتبتله ان مادتة حلوة وايد واني استفدت منها وايد ولي الشرف اني اكون في مادته ( وانا كل يوم ارفع ايدي واقول يا عله مايربح ) واني وايد مستحية من التهبب الي سويته بالامتحان ومالي ويه اشوفه واسأل عن نتيجتي فيريت لو ان يدزلي النتيجة بالايميل بس هذا وجه الضيف والله يستر بس هذا كله مو مهم المهم اني ابي امي ابي ابوي وابي الحلوتين( طبعا عيوني الثنتين غلا وحلا) الله يحفظهم لي ويردهم بالسلامة وبالختام ما اقول الا مالت على ..........
قولوا لي ليش ؟..(.اشدعوة ولا احد يسألني ويقولي ليش؟) اوكي ليش؟ المعادلة سهلة الامتحان كان 25 سؤال اختياري وانا مشيرة 26 الي قهرني ان اول 15 سؤال كانوا الاجوبة كلها صح بس لما وصلت الحلوة ( الي اهيا انا) عند السؤال 15 مخي ما قام يقلب الصفحة لا مو بس جذي علق واطريت اسويله فورمات وعليكم الحساب حذف كل الفايلات وما خلالي الا اسمي وعنواني( الصراحة يعطي العافية على الاقل اقدر ارجع البيت مو يقولون خرجت ولم تعد!!) الخلاصة ان لما وصلت البيت قلت مالج الا حل واحد يا هلا والي هو اني اطرش ايميل حق الدكتور واساحلة ومن مجمل الكلام الي كتبتله ان مادتة حلوة وايد واني استفدت منها وايد ولي الشرف اني اكون في مادته ( وانا كل يوم ارفع ايدي واقول يا عله مايربح ) واني وايد مستحية من التهبب الي سويته بالامتحان ومالي ويه اشوفه واسأل عن نتيجتي فيريت لو ان يدزلي النتيجة بالايميل بس هذا وجه الضيف والله يستر بس هذا كله مو مهم المهم اني ابي امي ابي ابوي وابي الحلوتين( طبعا عيوني الثنتين غلا وحلا) الله يحفظهم لي ويردهم بالسلامة وبالختام ما اقول الا مالت على ..........
هلا شربت
Sunday, February 1, 2009
العاملين في مطار الكويت الدولي
بما ان المدارس والجامعات عطلت والعطلة شهر كامل فالناس قبت من الديرة اوانا معاهم قبيت ورحت عند اوخيتي حلا الي صارلي سنة مو شايفتها فالمهم احنا رحنا المطار وعلى ما الوالد يدخل الجناط رحت انا والوالدة وقعدنا بستاربكس شربنا قهوة وروقنا حق الرحلة الغير منتهية الله يهداج يا حلا جان دورتي ديرة قريبة تروحينلها بس ما علينا الرحلة تهون في سبيل لقاء اختي الحنون (هههه شرايكم في القافية) المهم فعقب ما خلصنا رحنا نشوف شصار عالوالد ولا الكاونترات مسكرة والناس ما تقدر تدش داخل وصايرة عفرة داخل شرطة وناس تصعد فوق الكاونتر والي يسحب هذا وذاك لويه يعني ودخنه وانا بققت عيوني قلت شصار عاد الافكار السودة قامت تودينا وتييبني المهم عقب يمكن 20 الا 30 دقيقة شفنا الوالد افرجو عنه من داخل فقلناله شالسالفة ولا يقول في هندي يشتغل بالخطوط وقال حق واحد
"SHUT UP OR I'LL SLAP YOU!!!"
ياكبرها عند الله هندي يقول حق كويتي اسكت ولا اطقك طراق وين قاعدين حتى دبي الي 3\4 هنود ماصارت عندهم بس ارد واكرر هذي الكويت صل على النبي لا فوق كل هذا ما اعتذر الهندي ولا شي والشرطة يقولون حق الريال طبطب عالموضوع يا يقول انا تغيرت عليه انا ازعل اولع ماهو كل همو اوووووبس اندمجت بغنية نانسي سوري ما علينا بس تقولون راح يتعاقب هالهندي ولا كل العادة يطلع براءة؟؟؟
غلا شربت
Thursday, January 29, 2009
السبت اليوم المنتظر
شلونكم شخباركم
بعد يومين عندي حدث جدا مهم
بعد يومين عندي حدث جدا مهم
امي وابوي واختي غلا راح ايووني
وبما اني سنه مو شايفتهم فحدي مشتاقه لهم وقاعده اعد الايام والساعات
وصاير عندي استنفار في البيت من تعديل وتنظيف وتسنع
جنه لجنه تفتيش بتييني
يعني اهو كل شي مرتب بس قاعده ارتب زياده
وغلا اذبحتني كل شوي مطرشتلي مسج
مرة اييب سشوار ولا عندج ولا اييب شاحن ولا عندج لما ايي ابيج توديني اخذ خط ووووو
يننتني ولجتني جنها بتهاجر مو بتيه شهر
واييه على طاري الشهر
ماشاءالله خووش عطله عندكم
مو مخططين تسافرون
لان حسافه العطله ما تطوف
ويك اند سعيييد
حلا شربت
حلا شربت
Thursday, January 22, 2009
مــــيــــــاو
منو عنده قطوة بالبيت
صارلي فترة احن على ريلي ابي قطوة مع اني اخااف بس ما ادري ودي بقطوة
ريلي مو راضي يقولي شي يمشي بالبيت ما نبي تبين طير اخذلج بس قطوة لأ
ما ابي طير بس قتله اذا بتشتريلي اخذلي كاسكوو يونس وامي بعد توها ماخذتلها واحد وشوقتني
بس هم ابي قطوة بس المشكله برعايتها
احسها مهمه صعبه
ما ادري في احد منكم عنده قطوة ؟
ابي اعرف شلون اهتم فيها من اكل وتنظيف ورعايه يعني صعبه الشغله ولا سهالات ؟
عاد امس قعدت احن ابي قطوة وابي قطوة قامت بنتي تحن معاي ابي قطوة وشوي وتبجي عاد عقب قتلها تعرفين شنو يعني قطوة قعدت فكرت فكرت جان تقوول بيييييرد(يعني طير)
قتلها لا والله الي يشوفج تناقزين وتبين قطوة اخر شي عبالج طييير
بما انها نهاية الاسبوع
وتلبيه لطلب الاخت
vancouver
هذا احلى شربت من حلا شربت
Monday, January 19, 2009
سوالف اليهال
ساعات الياهل يطلعلك بسالفه من ما ادري وين
ومشكله اذا علق عليها
بنتي هالايام وااايد تسالني عن الله
منو سوانا ومنو سوى البيت ومنو سوى الشجر والخ
امس قاعدين على الغدى والوقت هذا احسن وقت عشان تسولف معاك
المهم قعدت بدون مقدمات قالتلي انتي لما تصيرين كبيره راح تموتين وتوه بتكمل جان ارد عليها
مو شرط ان انا كبيره يعني لازم امووت (خفت على عمري )
يعني يمكن يكون واحد صغير ويموت وذكرتها في بنت عندهم في المدرسه مسكينه توفت بالصيف الله يرحمها
ردت علي اييه صح يمكن مثل انسلي يمكن انا بس انتي راح تموتين (لا حوول ردينا علي انا )
ما ادري ليش مصره ان انا الي امووت مع ان ابووها قاعد (تهقوون حاقده علي ؟)
ولا اقوولها انزين يعني بكسر خاطرها يمكن تغير رايها
انا اذا مت انتي ديري بالج على ابوج واخوج انزين ردت بكل بروود انزين
بنتي حدها بايعتني (بين الحب )
عقب قالت اييه وبعدين بابا يموت واخوي
قتلها بس وانتي وين رحتي موتينا كلنا وانتي عايشه
قتلها خلاص اذا احنا متنا انتي تروحين عند وحده من يداتج عاد بخيرها الحين بتروح عند منو
هنييه انتبهت ان كلنا متنا ماعدى اهي جان تقولي بس انا راح اكوون وحيده ماعندي احد
يعني انكسر خاطرها على عمرها مو علينا
سكرنا السالفه
صار اليوم الثاني الصبح وحنا بطريجنا للمدرسه ولا تقولي بسالج سؤال قتلها سالي قالت نفرض يعني نفرض انا رحت النار (حق روحها نفرض وانا موتتني على طوول حتين ما فرضت شي)
عقب شنو راح يصير قتلها راح تردين انتي مرة ثانيه ويحطونج بالنار وجذيه يعني
مرة وحده نقز ولدي صججججج
(واخيرا نطق الاخ)
عاد قتلهم لا ان شاءالله تروحون الجنه نطوا اثنينهم شنو يعني جنه (تورط البطل )
انا الي يبته حق نفسي ولا شكو جنه وغيرها اهي بتروح النار كيفها
(ملاحظه عيالي العربي ضعيف عندهم بحكم الغربه والحوار كان بلهجتين الانجليزي من قبلهم وردي كان بالعربي عاد على حظي افهموا كل الكلام ماعدى الجنه)
فحاولت اغير الموضوع لان اعرف بنتي رايحين المدرسه ونسولف بهالشغلات الحين كله تخره لهم
عاد تعالوا رقعوا عقب
الله يستر من الاساله اليايه عسى تكون بعيده عن الموت والنار
حلا شربت
Sunday, January 18, 2009
مؤتمر القمة الاقتصادية العربية
السلام عليكم
قبل اسبوع وانا قاعدة بوحدة من المحاضرات ولا اسمع البنات يسئلون الدكتورة ويقولون لها اذا امتحان الفاينل راح يتأجل او لا عاد انا طقتني البوهه وقلت هو ليش شصاير عاد فهموني القصة وهالقصة اهيه محور حديثي اليوم
قبل اسبوع وانا قاعدة بوحدة من المحاضرات ولا اسمع البنات يسئلون الدكتورة ويقولون لها اذا امتحان الفاينل راح يتأجل او لا عاد انا طقتني البوهه وقلت هو ليش شصاير عاد فهموني القصة وهالقصة اهيه محور حديثي اليوم
كل الي بالكويت شايفين اللوية والحوسة الي مسويها مؤتمر القمة الاقتصادية العربية وانا اكثر شي باط جبدي الشوارع الي بتسكر
لا والاوقات الي بتسكر فيها عجيبة!! يعني مثلا طلبة الجامعة الي عندهم امتحانات فاينل لازم يطلعون من فير الله علشان مايروح عليهم الامتحان؟؟ يعني الطالب يبي يروح رايق فايق على الراحة عشان يقدر يحل عدل بتركيز مو طول ما اهوا بالطريج يحاتي يوصل او لا لا وعاد الي مثل حالتي قاعدين يدلونها طريج ثاني لاني مادل غير طريج واحد الي صوب قصر بيان فعاد هتاك كلش ماراح يكون الطريج مسكر فوالله كل ساعة اذكر نفسي بالطريج ماصارت مادري ادرس ولا افكر بالطريج و كفاية ماكو وقت حق الدراسة والواحد الثانية مايبيها تروح عليه واهمه عافسينا لا واذا فكرت تدرس بالجامعه الله عالكراسي لي قعدت عليهم أكثر من ساعة زين تقدر تمشي عقب من الالم و دازين مسجات لا تأجيل لامتحانات يومي 19و20 يناير الطرق مفتوحة من 6 ص الى 10 ومن 1 ظ الى 3ظ يعني دبروا حالكم تطلعون من الصبح تنامون بالجامعه المهم الطريج راح يتسكر واذا صارحق الواحد شي بالطريج لا سمح الله بنجر ولا شي راح عليه الامتحان و اذا الواحد واهو راد بالطريج سكروا عليه الطريج شيسوي بالله ينحكر لي متى؟؟ يعني شنو راح يصير لو أجلوا الامتحان ولا لو نظموا السالفة أكثر شوي بس ماقول الا هذي الكويت صل على النبي
داشة بقوة انا من اول موضوع بس الموضوع منرفزني وقلت اشاركم فيه وادق الحديد واهو حامي
غلا شربت
Saturday, January 17, 2009
الإفتتاح
السلام عليكم
بعد مشاورات ومحاورات وموافقه بالإجماع
قررنا احنا بنات عبدالغني شربت افتتاح البلوق
وان شاءالله نكون قروب جماعي حلو
ونتمنى ان يكون لنا مكان بين البلوقرز
Subscribe to:
Posts (Atom)